Azərbaycanda benzin istehsalı 8% artıb, dizel istehsalı 16% azalıb

Cari ilin yanvar-iyun ayları ərzində Azərbaycanda neft məhsullarının istehsalı sahəsində istehsalın ümumi dəyəri 1 mlrd. 330,4 mln. manat olmaqla əvvəlki ilin analoji dövrü ilə müqayisədə 7,3% azalıb. Dövlət Statistika Komitəsindən Avtosfer.az-a verilən məlumata görə, neft məhsullarından ağ neftin istehsalı 7,7% (297,5 min ton), yanacaq mazutunun istehsalı 38% (241,3 min ton), dizel yanacağının istehsalı 16,4% (958,7 min ton) azalıb. Hesabat dövründə 618 min ton avtomobil benzini istehsal olunub ki, bu da 2016-cı ilin yanvar-iyun ayları ilə müqayisədə 8% çoxdur. Xatırladaq ki, Tarif Şurasının qərarı ilə iyulun 15-dən etibarən Aİ-92 markalı avtomobil benzininin pərakəndə satış qiyməti bahalaşıb.