“Azərbaycanda istehsalla məşğul olmaq sahibkarlara sərf etmir” – NATİQ CƏFƏRLİ

Bu gün istər paytaxt Bakıda, istərsə də bölgələrdə binaların altında, yaxud da fərdi binaya sahib olan obyektlərin əksəriyyəti ölkəyə məhsul idxal edib satmaqla məşğuldur. Sahibkarlıq subyektlərinin böyük çoxluğu da ya geyim, ya da ki, telefon və mobil aksesuar satışını həyata keçirməkdə maraqlıdır. Bunun səbəbi qeyd olunan istiqamətlərin az xərclə başa gəlməsi və yaxın müddətdə çox gəlir götürməyə kömək etməsidir. Kafe və restoranlarda da sahibkarlar fərqli ideyalar irəli sürmür. Yalnız hansısa istehsalçının hazırladığı məhsulu təqlid etməklə gəlir qazanmağa çalışır. Bu isə ölkədə istehsal bazarının getdikcə qıtlaşmasına gətirib çıxarır.

Bəs Azərbaycanda istehsalla məşğul olmaq üçün sahibkarlara hansı güzəştlər edilməlidir? Bu istiqamətdfə təşviq proqramları nə qədər effektlidir?

Mövzu ilə bağlı iqtisadçı ekspert Natiq Cəfərli Avtosfer.az-a müsahibəsində deyib ki, Azərbaycanda kiçik və orta sahibkarlığın inkişafı üçün ayrı-ayrı sektorlarla bağlı təşviq proqramları artıq işləmir.

“Ölkədə elə şərait yaranmalıldır ki, hansısa məhsulun istehsalı rahat olsun. Bunun üçün vergi və gömrük güzəştləri ilə yanaşı, uzunmüddətli ya faizsiz, ya da azfaizli kreditlərə ehtiyac var. Amma bu kreditlər mütləq şəkildə uzunmüddətli olmalıdır. Bunun üçün kiçik və orta sahibkarlığa dəstək üçün investisiya bankı yaradılmalıdır. Bu bank çərçivəsində müəyyən layihələrə, invesitisyalara vəsait ayırmaq mümkün ola bilər. Azərbaycanda bu gün istehsalla məşğul olmaq sərfəli deyil. Problem buradan qaynaqlanır. Çünki həm kommunal xidmətlər bahadır, həm vergilər yüksəkdir, belə olan halda da sahibkarların kreditlərə çıxış imkanları məhdudlaşır. Nəticə etibarilə, istehsalla məşğul olan sahibkarların sayı azalır”.

Səfər