Bakıda 59 nömrəli məktəbdə müəllim şagirdləri döyüb - VİDEO - YENİLƏNİB

19.01.2023-cü il tarixində 59 nömrəli tam orta məktəbin Azərbaycan dili və ədəbiyyat müəllimi tərəfindən VI sinif şagirdlərinə qarşı uyğunsuz davranış ilə bağlı məktəb rəhbərliyi tərəfindən müəllimlə müvafiq söhbət aparılıb.

Avtosfer.az xəbər verir ki, bu barədə məktəbdən məlumat verilib.Müəllim bir neçə şagirdin dərs prosesinin gedişinə mane olduğunu, təkrar xəbərdarlıqlardan nəticə çıxarmadıqlarını, dərsi izah etməyə maneə yaratdıqlarını, bu səbəbdən məlum vəziyyətin yarandığını nəzərə çatdırıb. Həmçinin belə halların təkrarlanmayacağını, şagirdlərini sevdiyini, mövzuları izah etmək üçün ancaq tədris prosesinə uyğun üsullardan istifadə edəcəyini bildirib.

Həmin gün valideynlərlə əlaqə saxlanılıb, onlar görüş üçün məktəbə dəvət olunublar. Şagirdlərin məqsədyönlü şəkildə şıltaqlıq edərək dərs prosesini pozması, müvafiq görüntüləri ictimailəşdirərək müəllim nüfuzuna xələl gətirən müzakirələrə səbəb olması onların valideynləri tərəfindən də qətiyyətlə qınanır, məsələnin məktəbdaxili müzakirələr çərçivəsində aydınlaşdırılmasını dəstəklədiklərini bildirirlər. (apa)

***

Bakıda müəllimin şagirdlərə şiddət göstərməsi əks olunan görüntü yayılıb.

DİN-in mətbuat xidmətindən bildirilib ki, hadisə Bakıda yerləşən məktəblərin birində qeydə alınıb.

Hazırda araşdırma aparılır.

***

Azərbaycanda məktəbin sinif otağında rəzalət yaşandığını əks etdirən növbəti görüntü yayılıb.  

Baku.ws xəbər verir ki, videoda orta yaşlı müəllimin dərs zamanı şagirdlərə nəzarəti tamamilə itirdiyi görünür.

Müəllim nizam-intizama tabe olmayan uşaqlara qarşı ağır ifadələr səsləndirərək onlara qarşı şiddət də tətbiq edir. Amma bunun da bir xeyri olmur və sinifdəki xaos pik həddə çatır.

Biabırçı görüntülərin yayıldığı sözügedən videonu təqdim edirik: