Azərbaycanda tibbi helikopterlərdən istifadə olunur?

Dünyanın əksər ölkələrində səhiyyə sahəsində tibbi helikopterlərdən mütəmadi istifadə olunur. Azərbaycanda da bəzən elə şərait yaranır ki, Təcili Tibbi Yardım xidmətinin işi çətinləşir. Məsələn, şaxtalı və qarlı havalarda tibbi yardım maşınlarının hərəkət edə bilmədiyi vaxtlar olur. Bölgələrdə ağır xəstələrin mərkəzə gətirilməsi ehtiyacı yarandığı vaxtlar olur ki, Təcili Tibbi Yardım maşınları bunun öhdəsindən gələ bilmir. 

Bəs Azərbaycanda nə qədər tibbi yardım helikopteri var və hansı hallarda istifadə olunur? Avtosfer.az xəbər verir ki, məsələ ilə bağlı qaynarinfo.az-a danışan Səhiyyə Nazirliyinin Təcili və Təxirəsalınmaz Tibbi Yardım Stansiyasının baş həkimi Mirələm Cəlalov bildirib ki, dövlətə məxsus iki tibbi helikopter var:  "Onlar Zabrat aeroportunda saxlanılır. Lazım olanda bu helikopterlərdən də istifadə edirik. Əsasən bölgələrdə olan ağır xəstələrin paytaxta gətirilməsi üçün istifadə olunur".

Mirələm Cəlalov Səhiyyə Nazirliyinin balansında reanimobillərin olduğunu da vurğulayıb: "Bu maşınlarda reanimasiya şöbəsində olan bütün cihazlar quraşdırılıb. Helikopterlərə isə ehtiyac duyulanda istifadə olunur. Yəni uzaq məsafə olanda, Təcili Tibbi Yardım maşınının gedib çatması uzun zaman alarsa, helikopterlər göndərilir. Helikopterlər istifadə olunarkən onların maddi xərcləri dövlət hesabına ödənilir".