Azərbaycanlı diplomatın taksi sürücüsü tərəfindən döyülməsinin VİDEOsu yayıldı

Dünən gecə Moskvanın mərkəzində Azərbaycanın Rusiyadakı səfirinin müşaviri, konsulluq şöbəsinin rəhbəri Emil Məhərrəmov döyülüb. Hazırda Məhərrəmov Moskva xəstəxanalarından birindədir. Bu barədə Sputnik-ə Azərbaycanın Rusiyadakı səfirliyindən məlumat veriblər.  Hadisə Moskvanın Konyuşkov küçəsində baş verib. İnsidentin təfərrüatları məlum deyil. Hazırda faktın təhqiqatı Azərbaycanın Rusiyadakı səfiri Polad Bülbüloğlunun nəzarətindədir. Zərərçəkmiş artıq hüquq-mühafizə orqanlarına müraciət edib. Hələlik Məhərrəmovun taksi sürücüsü ilə münaqişə etdiyi bildirilir. Sürücü dağıstanlı olub.

Rusiya KİV-nin məlumatına əsasən, konsulun döyülməsində iştirak edən sürücü saxlanılıb. Bu 31 yaşlı Haybulla Hacıyevdir. Məhərrəmov baş və bədən nahiyələrindən çoxsaylı zərbələrlə xəstəxanaya çatdırılıb. O kəllə-beyin travması alıb, qaşı və dodağı partlayıb. Emil Məhərrəmov hazırda xəstəxanadadır.

Hazırda insidentin səbəbləri aydınlaşdırılır.