Badamdar - 20-ci sahə yolunun yaxınlığında torpaq aşınması baş verib - FOTO

“Badamdar yamacında torpaq qatı texnogen mənşəli sularla yuyulub. Yamacın kiçik bir hissəsində isə yarğana bənzər aşınma müşahidə edilib”. Bunu APA-ya Ekologiya və Təbii Sərvətlər Nazirliyinin (ETSN) Milli Geoloji Kəşfiyyat Xidmətinin geoloji planlama ekspedisiyasının dəstə rəisi Rafiq Həsənov deyib. O bildirib ki, yamacın aşağı hissəsində fərdi yaşayış evlərinə gedən kanalizasiya borusu partlayıb, bundan sonra isə su sızması baş verib: “Çirkab suları yamac aşağı axıb. Nəticədə yamac, torpaq qatı yuyulub və cavan ağaclar kökündən çıxıb”.

Dəstə rəisi qeyd edib ki, aşınmanın baş verdiyi yamac Badamdar - 20-ci sahə avtomobil yolunun sağ hissəsində, yoldan təxminən 70-80  metr məsafədə yerləşir. O əlavə edib ki, yol torpaq qatından təmizlənib.