Bakı aeroportu ən yaxşı 100-lükdə

Dünyanın ən yaxşı hava limanlarının adları açıqlanıb. Avtosfer.az-ın istipress-ə istinadən məlumatına görə, "Skytrax World Airport Awards" hava limanlarına verilən ən nüfuzlu mükafatlardandır. Seçim 105 ölkə arasında keçirilib. Sorğuda 14 milyondan çox sərnişin iştirak edib. Ümumilikdə bütün dünya üzrə 550 hava limanı qiymətləndirilib. Qiymətləndirmə zamanı qeydiyyat, gəliş, transfer, alış-veriş, təhlükəsizlik, immiqrasiya və s. məqamlar nəzərə alınır.

İlk pillədə Sinqapuru Çanqi hava limanı qərarlaşıb. Britaniyanın "Skytrax" şirkəti tərəfindən hazırlanan hesabatda bu hava limanı 5 ildir ki, qalib olur. İkinci yerdə Tokio beynəlxalq hava limanıdır. Üçüncü yerdə Cənubi Koreyanın İnçxou aeroportu qərarlaşıb.

Onluqda Münhen, Honkonq, Doha, Sürix, London, Frankfurt hava limanları yer alıb.

Heydər Əliyev Beynəlxalq Hava Limanı nüfuzlu “Skytrax World Airport Awards” mükafatına layiq görülənlər sırasındadır. Bakı hava limanı Rusiya və MDB ölkələrinin bütün hava limanları arasında göstərilən xidmət səviyyəsinə görə ən yaxşılar siyahısına başçılıq edir.

“The World Airport Awards” mükafatı ən nüfuzlu qiymətləndirmə hesab olunur.

Qeyd edək ki, 2015-ci ildə Heydər Əliyev Beynəlxalq Hava Limanı “Skytrax”ın nüfuzlu "4 ulduz" reytinqinə layiq görülüb və bir daha bu yüksək səviyyəyə layiq olduğunu sübut edib. İndiyədək dünyada yalnız 37 hava limanı bu reytinqə layiq görülüb.