Bakıda avtobus zolaqlarını kim salacaq?

Bakı Nəqliyyat Agentliyi (BNA) tərəfindən paytaxtın 9 küçə və prospektinin layihələndirilməsi həyata keçirilib. Avtosfer.az milli.az-a istinadən xəbər verir ki, yeni layihəyə əsasən, bu küçələrdə xüsusi avtobus zolaqları salınacaq. BNA-nın ümumi istifadədə olan nəqliyyat vasitələri üçün xüsusi hərəkət zolaqlarının təşkil edilməsi barədə təklifi Nazirlər Kabinetinin Yol Hərəkəti Təhlükəsizliyi Komissiyası tərəfindən məqbul hesab edilib.

Qeyd edilir ki, ictimai nəqliyyatın təhlükəsizliyi və sərnişinlərin rahatlığına xidmət edəcək bu yeniliyin yaxın aylarda icrasına başlanılacaq.

Bəllidir ki, yollarda zolaqların salınması, xətlərin çəkilməsi işlərini "Azəravtoyol" ASC həyata keçirir. Lakin məlum olub ki, bu qurumun məsələdən ümumiyyətlə xəbəri yoxdur. Belə ki, "Azəravtoyol" ASC-nin mətbuat xidmətinin rəhbəri Anar Nəcəfli bildirib ki, onlara bu barədə heç bir məlumat verilməyib: "Avtobus zolaqları ilə bağlı bizə heç bir tapşırıq verilməyib. Bununla bağlı ilk növbədə qərar qəbul edilməlidir ki, sonra bizim tərəfimizdən icra olunsun. Amma hələ ki, belə bir şey yoxdur".

Qeyd edək ki, BNA-nın açıqlamasına görə, bu təklif artıq hökumət tərəfindən müsbət qəbul edilib və bunun üçün konkret yollar da müəyyən edilib. İlkin olaraq, Babək, Xocalı, Nobel, Gəncə prospektlərində, M.Useynov, Ə.Rəcəbli, M.Füzuli (Qış parkı boyunca), M.Əliyev və Y.Səfərov küçələrində ümumi istifadədə olan nəqliyyat vasitələri üçün müvafiq yol nişanı qurulmaqla xüsusi hərəkət zolaqlarının təşkil edilməsinə razılıq verilib.