Bakıda bağlanmış yollarla bağlı ən son məlumat

Hazırda Bakının bağlanmış 5 küçə və prospektində təmir işləri aparılır.

Avtosfer.az xəbər verir ki, bu barədə Nəqliyyatı İntellektual İdarəetmə Mərkəzindən (NİİM) məlumat veriblər.

Qeyd edilib ki, Alfred Nobel prospektinin K.Kərimov küçəsi ilə kəsişməsində şəhər istiqamətində 4-cü zolaqda təmir işləri aparılır.

Ceyhun Səlimov küçəsinin Mərkəzi Hərbi Hospitalın qarşısından 3-cü mikrorayon dairəsi istiqamətində olan hissəsi metronun yeni stansiyasının tikintisi ilə əlaqədar olaraq uzun müddətlik bağlanıb.

Neftçilər prospektində Zərifə Əliyeva küçəsi ilə kəsişməsindən "Azneft" dairəsinə qədər olan hissəsində yolun "Azneft dairəsi" istiqamətində iki zolaq bağlanıb, hazırda təmir işləri gedir.

Əziz Əliyev küçəsi Qoşa Qala qapısının önündə aparılan təmir işləri ilə əlaqədar olaraq müvəqqəti bağlanıb.

Nəhayət, Heydər Əliyev prospektindən Davud Aslan küçəsinə giriş bağlıdır.

Nəqliyyat vasitələrinin sürücülərinə bunları nəzərə almaq və göstərilən istiqamətlər üzrə hərəkət edərkən alternativ yollar seçmək tövsiyə olunur.