“Bakıda daha çox ayaqyolu düzəltsəydilər, yaxşı olardı” - Niko Rosberq

Bakıda keçirilmiş “Formula 1” Avropa Qran-Prisinin qalibi Niko Rosberq yarışdan sonra gələn il ayaqyoluların sayının artırılmasını xahiş edib. Yarış başa çatdıqdan sonra Rosberq bildirib ki, ötən həftəsonu onu bir çox şeylər təəccübləndirib. Bunlar təhlükəsizlik avtomobillərinin olmaması, yarış vaxtı hər hansı qəzanın baş verməməsi və başqa nüanslar. Sonradan məlum olub ki, “Mercedes” komandasının pilotu uzun müddət ayaqyoluna növbə gözləməli olub və buna əsəbiləşib. Avtosfer.az xəbər verir ki, bu barədə autosport.com.ru yazıb. Həmin sayta inansaq, Rosberq bunları deyib: “Təşkilatçılar daha çox ayaqyolu düzəltsəydilər, daha yaxşı olardı. Bu həftəsonu növbələrdə çox vaxt keçirməli oldum”.

Qeyd edək ki, bu narahatlıq alman pilota yarışda qalib gəlməyə mane ola bilməyib.