Bakıda itirilmiş 5400 manatlıq noutbukun sahibi tapıldı - FOTO

Bir neçə gün öncə “BakuBus”a məxsus Hava Limanı ekspress xətti üzrə hərəkət edən avtobusda xarici vətəndaşa məxsus olduğu güman edilən Apple MacBook Pro notbukunun unudulduğu barədə məlumat vermişdik. Avtosfer.az xəbər verir ki, həmin notbukun tapılması üçün “BakuBus” tərəfindən istehsalçı şirkətə müraciət olundu. Notbukun sahibinin mail adresi əldə olunaraq onunla əlaqə saxlanıldı. Məlum oldu ki, notbukun sahibi olan şəxs Ukrayna vətəndaşıdır. Əşya sahibinin nümayəndəsi tələb olunan zəruri məlumatlar və sənədlərlə bu gün “BakuBus” MMC-in inzibati binasına yaxınlaşaraq notbuku təhvil alıb. Qeyd edək ki, hər zaman sərnişin məmnuniyyəti qazanmağı prioritet məsələ kimi qarşısına məqsəd qoyan “BakuBus” itmiş əşyalara qarşı xüsusi həssaslıqla yanaşır və onların sahiblərinin aşkarlanması üçün mümkün vasitələrə əl atır. Həmçinin avtobuslarda itirilmiş əşyaları sahiblərinə təqdim etməklə bu yöndə maarifləndirmə işləri aparır.