Bakıda keçirilən WUF13 forumu bu gün başa çatır

Bakıda təşkil olunan Ümumdünya Şəhərsalma Forumunun (WUF13) 13-cü sessiyası bu gün rəsmi olaraq yekunlaşacaq.

Avtosfer.az xəbər verir ki, günün proqramına şəhərsalma, dayanıqlı inkişaf və təhlükəsiz yaşayış məkanları ilə bağlı panel müzakirələri, konfranslar və dəyirmi masalar daxildir. Forumun ikinci yarısında isə rəsmi bağlanış mərasimi keçiriləcək.

Tədbir bayraq təhvilvermə mərasimi ilə başa çatacaq. Növbəti Ümumdünya Şəhərsalma Forumunun 2028-ci ildə Meksikada təşkili planlaşdırılır.

Xatırladaq ki, forum fəaliyyətinə mayın 17-də başlayıb, mayın 18-də isə rəsmi açılış mərasimi keçirilib. Açılışda Azərbaycan Prezidenti İlham Əliyev iştirak edərək çıxış edib.

BMT-nin Məskunlaşma Proqramı – UN-Habitat və Azərbaycan hökumətinin birgə təşkil etdiyi tədbir “Hər kəs üçün yaşayış yerləri: Təhlükəsiz və dayanıqlı şəhərlər və yaşayış məskənləri” mövzusuna həsr olunub.

Forum tarixində ilk dəfə olaraq qeydiyyatdan keçən iştirakçıların sayı 40 mini ötüb. Eyni zamanda, tədbir çərçivəsində Azərbaycanın təşəbbüsü ilə ilk dəfə Liderlər Sammiti də təşkil olunub.