Bakıda "Lexus" piyadanın yolunu belə kəsdi – FOTO+VİDEO

Bakı yollarında nəqliyyat vasitələrinin dayanma, durma, parklama qaydalarını pozmasına hər gün, hər dəqiqə rast gəlmək olar. Görülən bütün cəza və maarifləndirici tədbirlərə baxmayaraq, bu problemi həll etmək mümkün olmur ki, olmur.

Bəziləri isə yol polisinin cəriməsinə tuş gəlməmək üçün çıxış yolunu avtomobillərini səkilərdə, piyada yolunun üstündə saxlamaqda görürlər. Bu zaman nəzərə almırlar ki, piyada həmin ərazidən keçmək üçün həyatını təhlükəyə atıb avtomobil yoluna çıxmalı olur.

Avtosfer.az xəbər verir ki, bu barədə oxuculardan birinin milli.az-a göndərdiyi foto və video materialdan açıq-aydın görünür ki, Bakının Qələbə meydanı ərazisində "Lexus" markalı, "90 RP 252" dövlət qeydiyyat nişanlı avtomobilin sürücüsü yolda parklama qadağan olunduğu üçün avtomobili bütün səki boyu saxlayıb. Maraqlısı ondadır ki, sürücü avtomobili saxlayıb harasa getməyib. Elə içindəcə, sərnişini ilə oturub söhbət edir: "Bu maşının sürücüsü düz bir saata yaxın bizim yolumuzu kəsib özünə yer eləmişdi. Axı belə olmaz. Məgər piyadalar da onların yolu üzərində dursalar, yaxşı olar?!"

Qeyd edək ki, bu hal dayanma, durma, parklama qaydalarının pozulması kimi qiymətləndirilir və İnzibati Xətalar Məcəlləsinin müvafiq maddəsinə əsasən, sürücü inzibati məsuliyyətə cəlb edilərək cərimə olunur.