Bakıda yolkəsən marşrut sahibi peyda olub?

Avtosfer.az xəbər verir ki, bu barədə Bakının xanım sakinlərindən biri milli.az-a məktub yazaraq aprelin 15-də axşam saatlarında paytaxtın ictimai nəqliyyatında başına hadisə gəldiyini bildirib. Şikayətçi sərnişin müvafiq qurumların bununla bağlı təcili ölçü götürməsini istəyib:   "Axşam saat 9 radələrində 94 saylı marşrutla gəlirdim. "Neftçilər"də bir qrup şəxs yolu kəsdi, camaatı avtobusdan düşürtdü. Bütün sərnişinlər təlaş içində idi. Qorxduq. Sonradan öyrəndik ki, 36 saylı marşrutun sahibi 94 saylı marşrutu "Xalqlar dostluğu"na buraxmır. Məqsəd isə insanları məcbur edib öz marşrutuna mindirməkdir. Bu qədər insan bu vicdansız şəxsə görə stress kecirtdi. Bu nə özbaşınalıqdır? 5 manat artıq pul qazanacaq deyə camaat əziyyət çəkməlidir? Xatırlatmaq istəyirəm ki, 94 nömrəli marşrut "Xalqlar dostluğu"ndan Yeni Yasamala gedir və Avropa oyunları öncəsi ləğv olunmuşdu. Yenicə bərpa olunub və biz sərnişinlər bundan razıyıq, mənzil başına rahat çatırıq. Xahis edirəm, 36 saylı marşrutun sahibi kimdirsə, onun barəsində ölçü götürülsün. Özünü nə hesab edir ki, yol kəsir. Belə qudurub? Bir qadının qorxudan az qala ürəyi gedəcəkdi. O qadına nəsə olsaydı, nə cavab verəcəkdi?"

Məsələ ilə bağlı Bakı Nəqliyyat Agentliyi Nəqliyyatı İntellektual İdarəetmə Mərkəzinə (NİİM) müraciət etdik. NİİM-in ictimai əlaqələr üzrə mütəxəssisi Rauf Mirqulamov deyib ki, onlar artıq məsələdən xəbərdardırlar və hazırda bununla bağlı araşdırma aparılır.