Bakının mərkəzindəki “Naxçıvan” hoteli söküldü; ətrafı toz bürüyüb - VİDEO

Bakının İzmir və Abbasqulu ağa Bakıxanov küçələrinin kəsişməsində yerləşən "Naxçıvan" hotelinin binasının sökülməsi işlərinə başlanılıb. Bununla əlaqədar, Dövlət Şəhərsalma və Arxitektura Komitəsindən Avtosfer.az-a bildirilib ki, sözügedən ərazidə yeni mehmanxana binasının inşası həyata keçiriləcək.

Hotelin binasının 1 ildən uzun müddətdir ki, sökülməsi planlaşdırılsa da, nəhayət bu gün ərazidə eskavatorların işləməsi müşahidə olunub. Sosial şəbəkələrdə yayılan görüntülərdən sonra söküntü işlərinin ətrafında səkidə təhlükəsizlik tədbirləri görülüb.

Ərazi ilə bağlı isə bir sıra problemlər ortaya çıxıb. Belə ki, tikinti zamanı yüksək tozlu mühit yaranıb. Əraziyə yaxın yerləşən İzmir parkındakı, eləcə də küçələrdən istifadə edən vətəndaşların bu tozdan zərər görməsinə qarşı heç bir qabaqlaycı tədbir görülməyib. Tikintidə çalışan işçilərdən biri tozla bağlı tədbir görüldüyünü, bu tədbirin isə sadəcə arabir su səpmələri olduğunu deyib.

Bakıxanov və İzmir küçələrində səkidə təhlükəsizliyi təmin etmək üçün isə hotelin gördüyü iş avtomobil yolunun 1 zolağını zəbt etmək olub. Bu təhlükəsizlik tədbiri isə bir neçə konus və lentdən ibarət imiş.

Ərazidən çəkilən həmin videonu sizə təqdim edirik:

Səfər