“BakuBus”ın sürücüsü sərnişinin həyatını xilas edib - VİDEO

Hadisə "BakuBus"a məxsus avtobusda olub. Bakıda "BakuBus"un sürücüsü sərnişini ölümdən xilas etdi. Avtosfer.az xəbər verir ki, şirkətdən verilən məlumata görə, hadisə yanvarın 26-da saat 09:15-də Tbilisi prospektindən hərəkət edən "BakuBus"a məxsus 6 saylı marşrut avtobusunda baş verib. Hadisə zamanı sürücü Novruzov Oqtay Şair oğlu öz xidməti vəzifəsini yerinə yetirərək, huşunu itirib yerə yıxılan sərnişinə ilk tibbi yardım göstərib. Sürücü sərnişinin həyatını xilas edib. Kadrlardan da görünür ki, gənc oğlanın qəfildən vəziyyəti pisləşir və o, yıxılır. Sürücü öz yerini tərk edərək ona yaxınlaşır və yardıma başlayır. Qeyd edək ki, "BakuBus" sürücüləri Təlim Mərkəzində kurslara cəlb olunur və onlara ilkin tibbi yardımın göstərilməsi ilə bağlı nəzəri və praktiki dərslər keçirilir.