“British Airways”in əməkdaşları yenidən tətil planlaşdırır

“British Airways” şirkətinin əməkdaşları fevral ayında yenidən tətil etməyi planlaşdırırlar. Şirkətin üç min əməkdaşının üzv olduğu “Unite” həmkarlar ittifaqı bildirib ki, etiraz aksiyaları fevralın 5-dən 11-dək davam edəcək. Avtosfer.az xəbər verir ki, bu barədə Həmkarlar ittifaqının “British Airways”in rəhbərliyinə ünvanladığı məktubda deyilir: “Sizin əməkhaqqı ilə bağlı bizim üzvlərlə razılığa gəlməməyiniz və eyni zamanda, tətillərə imkan verməmək üçün milyonlarla funt sterlinq xərcləməyiniz göstərir ki, əslində ödəməyə pul var. Etiraf etməlisiniz ki, başqa yolla getmək mümkündür. Biz masa arxasında oturub danışıqlar aparmağı təklif edirik”. Məktubda bildirilir ki, razılıq əldə olunmayacağı təqdirdə tətillər mart ayında da keçiriləcək.