Bu küçədə 1 nəfərin hərəkəti üçün səki var, onun da ortasına işıq dirəkləri quraşdırılıb - VİDEO

Paytaxtın nəqliyyat infrastrukturu ilə əlaqədar bir sıra yeniliklərin planlaşdırılması ilə bağlı günlərdir xəbər dərc edirik. Şəhərin mərkəz və mərkəzə yaxın ərazilərində piyadaların hərəkətini asanlaşdırmaqla bağlı ölkə başçısının ötən ay imzaladığı sərəncamda bir sıra tapşırıqlar yer alıb.

Avtosfer.az xəbər verir ki, Bakının Səbail rayonundakı bəzi küçələrə də sərəncam daxilində dəyişikliklərin edilməsi bu ərazidə vətəndaşların təhlükəsiz hərəkətinə kömək edəcək.

Belə küçələrdən biri də “Dağüstü park”dan Bayıl qəsəbəsinə doğru irəliləyən Saraykin küçəsidir. Belə ki, küçədə təşkil edilən səki, daha doğrusu, asfaltdan azacıq hündür cığırdakı vəziyyət vətəndaşlar tərəfindən sosial şəbəkələrdə yayılbı və müzakirələrə səbəb olub.

Nəinki 2, heç 1 nəfərin belə rahat hərəkəti mümkün olmayan səkinin üstünə hələ üstəlik işıq dirəklərini hansı qurum, hansı idea çərçivəsində yerləşdirib, bilinmir. Bilinən odur ki, səki əvəzinə yüngül cığır açıb, onun da ortasına həftənin müəyyən günlərində elektrik enerjisi verilən işıq dirəkləri qoyulub ki, piyadalar dirəklə qarşılaşdıqda hasarın üstünə çıxıb irəliləsin.

Ərazidə 203 nömrəli orta məktəbin, eləcə də uşaq bağçalarının olduğunu nəzərə alsaq, yaranan vəziyyət həm məktəblilərin, həm də yaşlıların, azyaşlıların və uşaqlı qadınların həyatını təhlükə altına atır.

Sakinlər aidiyyəti qurumlardan ərazidəki şəraiti düzəltməyi xahiş edir.

Səfər