Bu yollarda tıxac yaranıb

Azadlıq prospektində bir neçə gündür ki, vəziyyət gərgin olaraq qalır. 

Bakı Nəqliyyat Agentliyindən (BNA) Avtosfer.az-a verilən məlumata görə, bu gün səhər saatlarından etibarən paytaxtın Azadlıq və Tbilisi prospektləri, Ceyhunbəy Hacıbəyli küçələrində fasilələrlə nəqliyyatın sıxlığı müşahidə olunur.

Bunu nəzərə alaraq deyilən istiqamətlərdə hərəkətdə olan sürücülərə alternativ yollardan istifadə etmək tövsiyə olunur.

Qeyd edək ki, Azadlıq prospekti Bakıda nəqliyyatın sıxlığının, eləcə də tıxacların ən çox müşahidə edildiyi yollardandır.

Xatırladaq ki, Azadlıq prospekti ilə Cəfər Xəndan, Səttar Bəhlulzadə və Naxçıvani küçələrinin kəsişən hissələrindən prospektə giriş-çıxış tam bağlıdır. Bununla əlaqədar M.Ə.Rəsulzadə qəsəbəsi istiqamətindən şəhərə doğru gələn avtonəqliyyat vasitələrinin sürücülərinə alternativ olaraq Süleyman Sani Axundov küçəsi ilə "Azadlıq prospekti" m/stansiyası və 8-ci mkr istiqamətinə, eləcə də Məsud Davudoğlu küçələri ilə 6-cı mkr. istiqamətinə hərəkət etmələri tövsiyə olunur. Azadlıq prospektinin sözügedən ərazisində tam məhdudlaşdırma təmir işləri bitənədək tətbiq olunacaq.

Bundan əlavə, sözügedən prospektin Ziya Bünyadov prospekti ilə kəsişməsindən Səttar Bəhlulzadə küçəsi ilə kəsişməsinədək hissəsində də yol bağlanıb.