Bulvar ərazisinin bir hissəsi niyə çəpərlənib? – RƏSMİ AÇIQLAMA - FOTO

Bakıdakı Dənizkənarı Bulvarın bir hissəsi hasarlanaraq hərəkət məhdudlaşdırılıb. 

Avtosfer.az xəbər verir ki, xüsusilə velosiped zolaqlarına giriş tamamilə qadağan edilməsi bu nəqliyyat vasitələrinin istifadəçiləri tərəfindən birmənalı qarşılanmayıb.
Sakinlər bildirirlər ki, bu ərazidə hərəkət azadlığının məhdudlaşdırılması, xüsusilə də velosiped sürənlər üçün əlavə çətinliklər yaradır. İddialara görə, bu məhdudiyyətlər “Formula-1” yarışları ilə əlaqədardır. Lakin qeyd edək ki, yarış sentyabr ayının ortalarında keçiriləcək. Bu səbəbdən də insanlar indidən belə tədbirlərin görülməsini məntiqsiz hesab edirlər.

Məsələ ilə bağlı Dənizkənarı Bulvar İdarəsinin mətbuat xidmətinin rəhbəri Əfsanə Mehdiyeva saytımıza açıqlamasında bildirib ki, “Formula-1” yarışlarının keçirildiyi Neftçilər prospektinə paralel, velosiped zolaqlarının olduğu yolkənarı hissədəki 2 nöqtədə Bakı Şəhər Halqası Əməliyyat Şirkəti tərəfindən tribunaların quraşdırılmasına hazırlıq işlərinə başlanıb:

“Hazırlıq işləri çərçivəsində əraziyə avadanlıq və materiallar gətirilib və bu səbəbdən qeyd edilən hissələr Bakı Şəhər Halqası Əməliyyat Şirkəti tərəfindən haşiyəyə alınıb”.

Eltac Zülfüqaroğlu