Cəlilabad-Yardımlı yolunda iri çatlar əmələ gəlib - TƏHLÜKƏ - VİDEO

Son yağıntılardan sonra Cəlilabad-Yardımlı avtomobil yolundakı sürüşmə zonalarında aktivlik müşahidə olunmağa başlayıb. Avtosfer.az-ın məlumatına görə, yolun Kövüzbulaq və Pərdi kəndləri arasındakı hissəsində müxtəlif yerlərdə iri çatlar əmələ gəlib. Yağıntıların təsirindən asfalt qatı tədricən sıradan çıxmağa başlayıb. Sürücülər isə bunun daha da təhlükəli ola biləcəyindən narahtdır. Buradakı yol yatağının eroziyaya uğraması istənilən vaxt sürüşmənin baş verməsinə şərait yaradır.

Kənd sakinləri deyirlər ki, ərazidən mütəmadi yük avtomobillərinin də keçməsi yolun sürüşməyə meylli ərazilərində çökmələrin yaranmasına gətirib çıxarıb. Xanəgah kəndində isə təpəlik ərazidə olan torpaq layları yola doğru axıb.

Qeyd edək ki, Cəlilabad -Yardımlı avtomobil yolu dağlıq və təpəlik ərazilərdən keçdiyi üçün sürüşmə sahəsində yerləşir. Hər il payız-qış mövsümündə ərazidəki sürüşmə zonaları aktivləşir.