Çin şirkəti iki təyyarəni İran neftinə dəyişib

İran Çinin "Haokun Energy" şirkətindən barter müqaviləsi ilə aldığı iki "Airbus A330" təyyarəsini hava donanmasına əlavə edib.

Avtosfer.az-ın məlumatına görə, bu barədə "Azad İran" "Telegram" kanalı ILNA agentliyinə istinadla xəbər yayıb.

Bildirilir ki, hər bir təyyarənin qiyməti 30 milyon dollardan az olub. Ümumi sövdələşmənin dəyəri isə İran nefti ilə təxminən 116 milyon dollar təşkil edib.

Saziş İranın keçmiş prezidenti İbrahim Rəisinin administrasiyası dövründə bağlanıb. Bu barədə aprel ayında keçmiş yol və şəhərsalma naziri Mehrdas Bəzrpaş məlumat verib.

Qeyd edək ki, barter sövdələşmələri İrana təyyarə və komponentlərin tədarükünü məhdudlaşdıran beynəlxalq sanksiyalardan yayınmağın yollarından birinə çevrilib.