COP29-la bağlı metroda iş rejimi dəyişəcəkmi? - RƏSMİ CAVAB

Məlum olduğu kimi, 11-22 noyabr aralığında Bakıda Birləşmiş Millətlər Təşkilatının İqlim Dəyişikliyi Konfransı (COP29) keçiriləcək. Ölkəyə 60 mindən çox qonağın, həmçinin onlarla dövlət və hökumət başçısının gələcəyini nəzərə alsaq, Bakıda müəyyən məhdudlaşdırıcı tədbirlərin tətbiqi qaçılmazdır.

Nazirlər Kabinetinin qərarına əsasən, həmin müddətdə dövlət qurumlarının 70%-nin iş rejimi dəyişdirilərək distant formaya keçiriləcək.

Maraqlıdır, həmin günlərdə Bakı metropoliteninin iş rejimində dəyişiklik gözlənilirmi?

Avtosfer.az xəbər verir ki, mövzu ilə bağlı Konkret.az-a danışan “Bakı Metropoliteni” QSC-nin mətbuat xidmətinin rəhbəri Bəxtiyar Məmmədov qrafikdə hər hansı dəyişikliyin nəzərdə tutulmadığını deyib:

“Tədris mövsümü başlayanda Bakı metropoliteninin iş rejimi onsuz da ən optimal və sıx qrafikə keçir. Bu səbəbdən də COP29 tədbirləri ilə bağlı qrafikdə hər hansı əlavə dəyişikliklər nəzərdə tutulmayıb”.