DİQQƏT! Bu avtobusların istiqaməti dəyişdirildi - FOTO

Bakıda altı müntəzəm marşrut xəttinin istiqaməti dəyişdirilib. Bu barədə Bakı Nəqliyyat Agentliyindən məlumat verilib. 

Bildirilib ki, sərnişinlərin ictimai nəqliyyatdan istifadəsini rahatlaşdırmaq məqsədilə müntəzəm marşrut xəttinin bir neçəsinin hərəkət istiqamətində dəyişikliklər edilib. 

Belə ki, dəyişikliyə əsasən, 15 və 22 nömrəli müntəzəm marşrut xətlərinin hərəkət sxemi Qara Qarayev prospekti və (“Xalqlar Dostluğu” metro stansiyası) Babək prospektindən keçməklə, 70 nömrəli müntəzəm marşrut xəttinin Sabunçu qəsəbəsi istiqamətində hərəkət sxemi Cəmşid Naxçıvanski küçəsi və Qara Qarayev prospekti ilə təşkil edilib.

53 nömrəli müntəzəm marşrut xəttinin Badamdar qəsəbəsi istiqamətində hərəkət sxemində dəyişiklik olunaraq Qurban Xəlilov küçəsi - Landau küçəsi - Şəfaət Mehdiyev küçəsi - Bəxtiyar Vahabzadə küçəsi - Hüseyn Cavid prospekti - Mikayıl Müşfiq küçəsindən keçməklə təşkil edilib.

33 nömrəli müntəzəm marşrut xəttinin 7-ci mikrorayon istiqamətində hərəkət sxemində dəyişiklik edilərək, Səməd Vurğun, Nəsib bəy Yusifbəyli küçəsi və Azadlıq prospekti ilə təşkil edilib. 78 nömrəli müntəzəm marşrut xəttinin başlanğıc dayanacaq məntəqəsi Azər Manafov küçəsi olmaqla, fəaliyyəti bərpa edilib.