Dispanserin qarşısı sahibsiz maşınlarla zəbt olunub - Piyadalar təhlükədədir - VİDEO

Paytaxtın Yasamal rayonu Müzəffər Həsənov ilə Dadaş Bünyadzadə küçələrinin kəsişməsində xoşagəlməz mənzərə hökm sürür.

Bununla bağlı izləyicilərdən biri Avtosfer.az-ın rəsmi “instagram” səhifəsinə videomaterial göndərib. Onun sözlərinə görə, ərazidə yerləşən 1 saylı Vərəm Əleyhinə Dispanserinin qarşısı sahibi bəlli olmayan maşınlar tərəfindən zəbt olunub. Belə ki, yolun sağ və sol tərəfində dayanan yararsız nəqliyyat vasitələri piyada və sürücülərə çətinlik yaradır. Nəticədə piyadalar məcbur qalaraq yolun hərəkət hissəsi ilə gedirlər. Bu isə qəza təhlükəsi yaradır. Şikayətçi bildirir ki, sahibsiz maşınlar günün pik saatlarında süni tıxaca da səbəb olur.  O, hətta vətəndaşların maşınların içinə müxtəlif tullantılar atdığını da qeyd edib.

Qeyd edək ki, izləyici xoşagəlməz mənzərənin təxmini 1 ildir davam etdiyini əlavə edib.

Nərmin