Elektrik avtomobillərinin infrastrukturunun inkişafı üçün yol xəritəsi hazırlanıb - AYNA

Elektrik avtomobillərinin ölkəyə gətirilməsi üçün tətbiq olunan vergi güzəştinin vaxtı 2026-cı ilin yanvar ayında başa çatır. Lakin karbon emissiyasının azaldılması üçün müvafiq təkliflər hazırlanıb hökumətə təqdim olunacaq. Elektrik avtomobillərinin infrastrukturunun inkişafı üçün Azərbaycan Yerüstü Nəqliyyat Agentliyi (AYNA) yol xəritəsi hazırlayıb və həyata keçirir.

Avtosfer.az xəbər verir ki, bu sözləri Bakı Enerji Həftəsi çərçivəsində keçirilən 22-ci Xəzər Beynəlxalq Nəqliyyat, Tranzit və Logistika sərgisində təşkil olunan “Azərbaycanda elektrik avtomobilləri üçün infrastrukturun inkişafı” panel müzakirəsində AYNA-nın Dövlət proqramlarının idarə edilməsi şöbəsinin müdiri Vüsal Abbasov deyib.

O bildirib ki, elektromobillərin təşviqi üçün AYNA bir sıra tədbirlər həyata keçirir və infrastruktur layihələrinin reallaşması istiqamətində işlər aparır.

V. Abbasov nəzərə çatdırıb ki, “AzərEnerji” tərəfindən regionlarda elektromobillər üçün elektrik doldurma məntəqələrinin sayı artırılır: “Dövlət elektrik doldurma cihazlarının idxalı üçün çox güzəştli vergilər tətbiq edir. Onların ehtiyat hissələri isə vergidən azad edilib. Bu tədbirlərin məqsədi ondan ibarətdir ki, elektromobil istifadəçiləri regionlara sərbəst səyahət edə bilsinlər”.