Ermənistan Zəngəzur dəhlizini amerikalılara vermək istəyir? – RƏSMİ AÇIQLAMA

Ermənistan Qərbi Zəngəzurdan (Sünik vilayəti) keçən yolun nəzarət səlahiyyətlərinin beynəlxalq şirkətə verilməsinə qarşı deyil. Avtosfer.az APA-ya istinadən xəbər verir ki, bunu Ermənistan xarici işlər nazirinin müavini Mnaçakan Safaryan “Azadlıq Radiosu”na müsahibəsində deyib.

Safaryan müsahibəsində bildirib ki, danışıqlar zamanı adətən bütün gündəlik üzrə mövzular müzakirə olunur:

“Fərqli təkliflər təqdim olunub, biz bununla bağlı açıqlamalar vermişik (söhbət Zəngəzurdakı yolun nəzarət səlahiyyətlərinin Amerika şirkətinə verilməsindən gedir). Bu, Ermənistanın maraqlarına nə qədər cavab verərsə, nə qədər məqsədəuyğun hesab olunarsa, baş verə bilər, ya da baş verməyə bilər… Bu, tərəflərin razılığına bağlıdır, hər iki tərəfin öz mövqeyindən razı qalacağı halda mümkündür, amma indi bu barədə konkret fikir söyləmək çətindir”.

"Ermənistan üçün yolun blokadadan çıxarılması funksiyalarının beynəlxalq şirkətə verilməsi mümkündürmü?" sualına isə Safaryan müsbət cavab verib:

“Əgər bu, elan etdiyimiz prinsiplərə tam cavab verirsə, bəli, həyata keçirilə bilər. Bu proses Ermənistanın suverenliyi, yurisdiksiyası və ərazi bütövlüyü çərçivəsində olmalıdır. Əgər bu prinsiplərə uyğundursa, mümkündür. Bu, müzakirə mövzusudur və qarşılıqlı razılıq təmin olunmalıdır”.

"İrəvan ABŞ-dan bu təklifləri nə vaxt alıb?" sualına isə Safaryan belə cavab verib:

“Dəqiq tarix demək çətindir, amma təkliflər olub... Yenidən vurğulamaq istəyirəm ki, əgər bu, Ermənistanın maraqlarına uyğun gəlirsə və blokadanın aradan qaldırılması çərçivəsinə daxil olursa, o zaman nəzərdən keçirilə bilər”.