Günorta kondisionersiz, axşam yeni qatarlar xəttə buraxılır?

Hazırda cəmi 3 ədəd kondisionerli qatarımız var. Gün ərzində isə metrodan 400-450 min sərnişin istifadə edir. Bəzilərinin bəxtinə kondisionerli qatarların düşməməsi normaldır. Avtosfer.az xəbər verir ki, bu sözləri Axar.az-a Bakı Metropoliteninin İctimaiyyətlə əlaqələr şöbəsinin müdiri Nəsimi Paşayev sərnişinlərin günorta saatlarında köhnə, axşam, sərin vaxtlarda isə yeni, kondisionerli qatarların xəttə buraxılması iddiasına cavab olaraq bildirib. N.Paşayevin sözlərinə görə, qatarlar hamısı qrafikə görə işləyir: “Qatarlar qrafik üzrə hərəkət edir. Bu da əvvəldən müəyyənləşdirilir. Əslində kondisionerli qatarlarımız sadəcə 3 ədəddir. Bu qədər qatarın içində 3 çox az rəqəmdir. Ona görə də bir çoxlarının rastına günorta saatlarında kondisionerli qatarlar çıxmaya bilər”.

Metropoliten sözçüsü bildirib ki, hazırda işlədilən qatarlarıın istifadə müddəti bitdikdə yeni qatarlar gətiriləcək: “Hazlırda xəttə yararsız, istifadə müddəti başa çatmış qatar yoxdur. Ehtiyac yarandığı təqdirdə təbii ki, yeni qatarlar alınacaq. Həmin qatarlar indiki qatarlardan çox-çox fərqlənəcək”.

Qeyd edək ki, metro istifadəçiləri qatarların qrafikinin düzgün bölüşdürülmədiyini, günorta vaxtı köhnə və kondisionersiz, axşam isə müasir və kondisionerli qatarların xəttə buraxılmasından narazılıq ediblər.