Günvurma ölümə səbəb ola bilər - Həkimdən xəbərdarlıq

Son bir neçə gündür paytaxtda havanın temperaturu kəskin artıb. Hətta 35-38 dərəcəyə qədər yüksəldiyinin şahidi oluruq. Kəskin istilər olarkən açıq havada işləyən insanların təhlükəsizliyi məsələsi də gündəmə gəlir. Belə olduqda günvurmaya məruz qalanların da sayı çoxalır. Vətəndaşlar istilərdə günvurmaya qarşı nələr edə bilərlər?

Məsələ ilə bağlı terapevt Sübhan Hacıyev Avtosfer.az saytına açıqlamasında bildirib ki, bu aylarda günvurma diaqnozu ilə təcili tibbi yardıma müraciətlərə tez-tez rast gəlinir. Kəskin istilər insanın beyin qan dövranında və ümumi qan dövranında ciddi patologiyalara gətirib çıxara bilər.

"Bu zaman pasiyentlərdə daha çox ürəkbulanma, başgicəllənmə, qusma, əzələ qıcolmaları, halsızlıq simptomları müşahidə olunur. Günvurma həddindən artıq ciddi və hətta ölümlə nəticələnə biləcək bir vəziyyətdir. Bu zaman ilkin tibbi yardımda dəqiqələrin çox önəmi var. Orqanizm uzun müddət tərləmə, susuzlaşma nəticəsində su duz mübadiləsi pozulur, nəticədə dövr edən qanın həcmi kəskin azalır. Bədəndə mayenin həcmi azaldıqda tərləmə dayanır və orqanizm özünü lazımi dərəcədə soyuda bilmir. Hərarət elə həddə çatır ki, beyin və digər vacib orqanlar öz fəaliyyət qabiliyyətini tezliklə itirməyə başlayır. Bu zaman peşəkar tibbi yardım olmazsa, insan orqanizmində psixolonevroloji əlamətlər baş verir".

Terapevt vurğulayıb ki, bu cür hallarla qarşılaşan zaman təcili tibbi yardım çağırmaq, gün vuran şəxsi üst geyimlərindən azad etmək, bütün bədənini sərin su ilə silmək lazımdır. Ən əsası isə tez-tez soyuq qəbul olunmalıdır. Həkim qeyd edib ki, açıq havada çalışan şəxslərin iş qrafikinin isə müəyyən aralıqlarla olması tövsiyyə olunur. Əks halda bu onların həyatı üçün ciddi təhlükədir.

Səfər Əlizadə