Hacıların ilk qrupu dönüb - Bakıya

Bu il həcc ziyarəti üçün Səudiyyə Ərəbistanına gedən zəvvarlar artıq Vətənə dönməyə başlayıblar. Avtosfer.az xəbər verir ki, zəvvarların ilk qafiləsini gətirən təyyarə saat 16:30-da Bakıya enib. Daha bir təyyarə reysinin axşam saat 19:05-də Bakıya gəlməsi gözlənilir.

Qafqaz Müsəlmanları İdarəsinin (QMİ) məsul işçisi, Azərbaycan Həcc missiyasının üzvü hacı Həmdulla Babayevin “Report”a verdiyi məlumata görə, ilk gələnlər Bakıdan ziyarətə öncə gedənlərdir: "Mədinədə olan zəvvarlarımızın vəziyyəti yaxşıdır. Onlar şəhərdə olan müqəddəs yerləri də ziyarət ediblər. Zəvvarlar şəhəri gəzir, yaxınları üçün hədiyyələr alırlar".

O bildirib ki, sentyabrın 20-də uçuş olmayacaq: "Zəvvarların digər qrupları sentyabrın 21-də və 22-də Vətənə qayıdacaqlar".

Qeyd edək ki, bu il Azərbaycandan həcc ziyarətinə 1050 zəvvar qatılıb.