Hava limanlarında “Çamadanım hara getdi?” qorxusuna son: “Google” və IATA-dan inqilabi qərar

Səyahət edənlərin ən böyük kabusu olan "baqajın itməsi" problemi rəsmən tarixə qovuşur. Avtosfer.az Resorting.aAz-a istinadən xəbər verir ki, 2026-cı ilin əvvəlindən etibarən aviasiya dünyasında tətbiq edilən "Ağıllı Baqaj" (Smart Luggage) sistemi və yeni beynəlxalq standartlar sayəsində artıq çamadanınızın yerini mobil telefonunuzdan saniyə-saniyə izləyə biləcəksiniz.

Proses necə olacaq?

Beynəlxalq Hava Nəqliyyatı Assosiasiyası (IATA) tərəfindən tətbiq edilən "Qətnamə 753" artıq bütün hava yollarından tələb edir ki, baqajın hər bir hərəkəti (qeydiyyat, təyyarəyə yüklənmə, transfer və çatdırılma) rəqəmsal olaraq qeydə alınsın. Bu, o deməkdir ki, çamadanınız "qaranlıq dəhlizlərdə" yox olmayacaq, onunla bağlı hər bir detal məlumat bazasına düşəcək.

Azərbaycanlı səyyahlar üçün nə dəyişir?

Artıq hava limanında saatlarla baqaj növbəsində gözləmək və ya itmiş çamadan üçün ərizə yazmaq dövrü bitir:

GPS və RFID dəstəyi: Yeni nəsil çamadanlar daxili GPS ilə təchiz olunub. "WorldTracer" sistemi vasitəsilə çamadanınız başqa ölkəyə getsə belə, yerini anında müəyyən etmək mümkündür.

Real vaxt rejimində izləmə: Təyyarədə əyləşərkən telefonunuza "Baqajınız uğurla yükləndi" bildirişi gələcək.

Hava yolları ilə məlumat paylaşımı: Əgər baqajınız gecikərsə, siz çamadanınızın yerini (məsələn, Apple AirTag və ya daxili sistemlə) aviaşirkətin işçiləri ilə paylaşıb onun sürətli tapılmasını təmin edə bilərsiniz.

Təhlükəsizlik və Batareya qaydalarına DİQQƏT!

Ağıllı çamadan alarkən bir məqama diqqət yetirməlisiniz: Təhlükəsizlik qaydalarına görə, daxili batareyası çıxarıla bilməyən bəzi "smart" modellərə uçuş qadağası qoyula bilər. Ekspertlər səyyahlara batareyası sökülə bilən və ya yalnız izləmə çipi olan modellərə üstünlük verməyi tövsiyə edir.