İsmayıllının kənd yolları təmir olunur - FOTO

İsmayıllı rayonunda Sumağallı-Qalacıq avtomobil yolunun 0-4 kilometrlik hissəsində və Çayqovuşan kənd yolunda cari təmir işləri aparılır. Sumağallı-Qalacıq yolunda yaranan qabarmalar aradan qaldırılır, çuxurlar doldurularaq dağılmış asfalt örtüyü yenidən bərpa olunur. Bundan əlavə, Çayqovuşan kəndinin mərkəzi yolu texnikanın qüvvəsi ilə düzləşdirilir və çınqıl material döşənir. Habelə, güclü yağışlar zamanı yaranan sel sularının yola ciddi ziyan vurmaması məqsədilə 6 yerdə suötürücü borular quraşdırılır. Görülmüş işlərdə kəndin imkanlı sakinləri yaxından iştirak edirlər. Növbəti mərhələlərdə yola asfalt döşənməsi nəzərdə tutulur. (AZƏRTAC)