İçərəsində iş adamı olan təyyarə yoxa çıxdı

Rusiya Federasiyasında göyərtəsində 2 nəfər olan yüngül mühərrikli təyyarə yoxa çıxıb. Avtosfer.az xəbər verir ki, bu barədə anspress-in yerli mətbuata istinadən verdiyi məlumata görə, hadisə federasiyanın Altay respublikası ərazisində qeydə alınıb. “A-33” markalı iki nəfərlik şəxsi təyyarə radarlardan itib.

Fövqəladə Hallar Nazirliyinin Sibir Regional Mərkəzinin əməkdaşları axtarış-xilasetmə əməliyyatına başlayıblar. "Bu vaxta qədər təyyarənin yeri və vəziyyəti məlum deyil. Axtarışlara FHN-nin "Mİ-8" helikopteri də qoşulub. Bundan başqa atla təmin edilmiş könüllülər və yanğın söndürənlər də hazırda itən  yüngül mühərrikli təyyarəni və ekipaj üzvlərini axtarırlar. Rayonun relyefi dağlıq olduğu üçün axtarış əsasən havadan həyata keçirilir”, - deyə mərkəzin əməkdaşı bildirib.

Təyyarənin ötən gün axşam saatlarında Ust-Koks hava limanından Tyuquryuka uçduğu bildirilir. Rusiya vaxtı ilə saat 2:00-da (Bakı vaxtı ilə 3:00) aeroportdan qalxan təyyarə ilə əlaqə qurmaq mümkün olmayıb. Radarlardan itən “A-33”ün içində Ust-Koksda bir neçə mağazanın sahibi olan yerli sahibkar Aleksandr Akentevin olduğu bildirilir.

"Təyyarənin içində iki insan olub. Onlardan biri məşhur sahibkar Aleksandr Akentev, ikinci şəxsin adı məlum deyil. Ehtimal ki, Akentev itmiş atlarının axtarışı üçün uçuş həyata keçirib", - FHN idarəsinin nümayəndəsi deyib.

“A-33” tədris təlim, patrul-yoxlama, turizm uçuşlarının icrası üçün nəzərdə tutulmuş rahat uçan monoplandır.