İşğal altındakı yol və körpülərimiz

Bu gün Azərbaycanda Avtomobil yolları işçilərinin peşə bayramı günüdür. Avtosfer.az xəbər verir ki, bu barədə "Azəryolservis" ASC-dən verilən məlumata görə, cəmiyyətin balansında ümumi istifadədə olan 17529 km uzunluqda avtomobil yolu var ki, onun da 4385 km-i Respublika əhəmiyyətli, 13158 km-i isə Yerli əhəmiyyətli avtomobil yollarından ibarətdir.

Bu yollardan 2670 km-i hazırda Ermənistan tərəfindən işğal olunmuş ərazilərdə qalıb. Cəmiyyətin balansında 1299 ədəd körpü var. Onlarda 160 körpü işqal olunmuş ərazilərdə yerləşir.

22 fevral - Avtomobil yolları işçilərinin peşə bayramı günü Azərbaycan Prezidenti İlham Əliyevin 2008-ci il fevralın 20-də imzaladığı "Azərbaycan Respublikası avtomobil yol işçilərinin peşə bayramının təsis edilməsi haqqında" Sərəncamı ilə qeyd edilir.

Hazırda ölkənin ümumi istifadədə olan respublika və yerli əhəmiyyətli avtomobil yollarının, körpülərin, tunellərin və yol qurğularının, həmçinin Bakı şəhərində yerləşən avtomobil yollarının, prospektlərin və küçələrin vəziyyətinə nəzarətin həyata keçirilməsi, qorunub-saxlanılması, layihələndirilməsi, tikilməsi, cari, orta və əsaslı təmir edilməsi işlərinin aparılmasını "Azəryolservis" Açıq Səhmdar Cəmiyyəti təmin edir.