Kirayə ev fırıldaqçıları “iş başında” – Beh adıyla pul alıb yoxa çıxdılar - FOTO

Havaların isinməsi ilə turizm mövsümü daha da aktivləşib. Kimisi xarici ölkələrə, kimisi isə Azərbaycanın səfalı bölgələrinə üz tutur. Rayona üz tutanlar isə əsasən otel və ya kirayə evlərə üstünlük verirlər. Təəssüf ki, bu zaman bəzi vətəndaşlar fırıldaqçıların qurbanına çevrilirlər.

Belə bir şikayət Avtosfer.az-ın “WhatsApp” xəttinə daxil olub. Bildirilib ki, tətil üçün rayona getmək istəyən şəxs internetdə rast gəldiyi elanda qeyd olunan mobil nömrə ilə əlaqə saxlayaraq kirayə ev barədə razılığa gəlib və ilkin olaraq 50 manat beh göndərib. Lakin daha sonra fırıldaqçı ona əlavə 100 manat da beh göndərməsini tələb edib. Səbəb kimi isə evin “əsas sahibi” ilə behin azlığına görə mübahisə yaşandığını deyib və başqa ev təklif edib.

Zərərçəkən isə yalnız həmin evi istədiyini və əgər mövcud deyilsə, pulunun geri qaytarılmasını tələb edib. Bundan sonra fırıldaqçı onun zənglərinə cavab verməyib və zərərçəkəni bloklayıb.
Qeyd edək ki, Daxili İşlər Nazirliyi dəfələrlə bu kimi hallara qarşı vətəndaşları diqqətli olmağa çağırıb. Turizm mövsümündə belə fırıldaq hadisələrinin artma ehtimalı yüksək olduğundan, vətəndaşlara yalnız etibarlı və rəsmi mənbələr vasitəsilə ev və ya otel sifarişi vermələri tövsiyə olunur.

Eltac Zülfüqaroğlu