Küçədə yol kəsib, quldurluq edən şəxslərə 17 İL HƏBS

Bu gün Bakı Ağır Cinayətlər Məhkəməsində quldurluq etməkdə təqsirləndirilən Sarvan Ramazanov və Şahin Şəfiyevin cinayət işi üzrə məhkəmə prosesi başa çatıb. Lent.az-ın məlumatına görə, hakim Tamellla Nəsrullayevanın sədrliyi ilə keçirilən prosesdə təqsirləndirilən şəxslərə hökm oxunub. Hakimlər kollegiyasının hökmü ilə S.Ramazanov 9 il, Ş.Şəfiyev isə 8 il müddətinə azadlıqdan məhrum edilib.

Qeyd edək ki, təqsirləndirilən şəxslər Bakıda paytaxt sakini Taleh Ağayevə qarşı quldurluq edərək küçədə onu döyüb, boğazına bıçaq dirəyib iki mobil telefonunu əlindən alaraq qaçıblar. T.Ağayevin polisə müraciətindən sonra Nizami rayon Polis İdarəsinin apardığı əməliyyat-axtarış tədbirləri zamanı hər iki şəxs saxlanılıb. Onlar ilkin ifadələri zamanı törətdikləri cinayət əməlini etiraf ediblər.