Lənkəran-Lerik yolu açıldı

Son 7 ildə sürüşmələrin aktiv olduğu Lənkəran-Lerik yolunda bu dəfə nəqliyyatın hərəkətinə, kökündən qopub yola düşən qollu-budaqlı nəhəng ağaclar maneə törədib. Hadisə yolun 28-ci km-də, sürüşmənin aktiv olduğu ərazidə yaşanıb. Avtosfer.az istipress-ə istinadən xəbər verir ki, Lerik üçün həyat əhəmiyyətli yolda nəqliyyatın intensiv hərəkətini təmin etmək məqsədi ilə gecə saatlarında yola ağır texnika və işçi heyəti cəlb edilib, iri ağaclar hissələrə bölünərək yoldan yığışdırılıb. Eyni zamanda daş-qaya parçaları, iri torpaq qatı yolun hərəkət hissəsindən kənarlaşdırılıb. Bu səbəbdən yol bir neçə saat nəqliyyat vasitələrinin üzünə bağlı qalıb. Hazırda sözügedən yol açıq olsa da, buz bağlaması səbəbindən sürücülər üçün təhlükəli olaraq qalır. Lerik Yol İstismar İdarəsinin rəisi Elxan Əliyev İstiPress-ə verdiyi açıqlamada bildirib ki, 40-cı km-dən başlayaraq 56-cı km-ə qədər yol tam buz bağlayıb. Şaxtalı hava şəraitində yolun buz qatını qum və duzla əritmək fiziki cəhətdən mümkün deyil. Ona görə də qış hazırlığı olmayan avtomobillərin həmin yoldan keçmələri olduqca təhlükəlidir. Xatırladaq ki, hazırda yağan qarın qalınlığı mərkəzdə 30 sm-ə, havanın tempraturu -8 dərəcəyə çatır. Gecə saatlarında ucqar dağlıq ərazidə tempratur -10-12 dərəcə arasında olub. Lerikdə və bölgədə yağıntılı hava şəraiti davam edir, rayonlara qar yağır.