Lerikdə dərəyə aşan avtomobilin sürücüsü xəstəxanada ölüb

Lerik rayonunda dərəyə aşan avtomobilin sürücüsü xəstəxanada ölüb. Avtosfer.az-ın "Report"a istinadən məlumatına görə, hadisə dekabrın 23-də rayonun Çayrud inzibati ərazi vahidliyinə daxil olan Andurma  kəndində qeydə alınıb. Belə ki, 28 yaşlı Andurma kənd sakini Niyaməddin Alibəy oğlu Nəcəfov "Chevrolet" markalı 10 XC 789 dövlət qeydiyyat nişanlı avtomobili ilə kənd istiqamətində hərəkətdə olarkən idarəetməni itirib. Nəticədə nəqliyyat vasitəsi yüksəklikdən dərəyə aşıb və sürücü ciddi bədən xəsarətləri alıb. N.Nəcəfov Lənkəran Rayon Mərkəzi Xəstəxanasının Reanimasiya şöbəsinə yerləşdirilib. Lakin həkimlərin ciddi səylərinə baxmayaraq, yaralı bu gün xəstəxanada keçinib. Mərhumun meyiti müayinə olunmaq üçün Məhkəmə Tibbi Ekspertiza və Pataloji Anatomiya Birliyinin Lənkəran rayon şöbəsinə təhvil verilib.

Faktla bağlı araşdırma aparılır.