"Metro heç yarım gün də insanların tələbatını ödəyə bilməz"

"Bir vaxtlar sığınacaq olan yerlər hal-hazırda özəl şirkətlər, sahibkarlar tərəfindən şəxsi maraqları üçün istifadə olunur". Avtosfer.az xəbər verir ki, bu sözləri milli.az-a açıqlamasında hərbi ekspert Üzeyir Cəfərov Azərbaycandakı bioloji sığınacaqların mövcud vəziyyəti barəsində danışarkən deyib. O, son zamanlar bu məsələnin arxa plana keçdiyini bildirib. "Əslində bu məsələ ilə Bakı Şəhər İcra Hakimiyyəti məşğul olmalıdır. Bakının hər zaman istənilən hadisəyə hazırlıqlı olması üçün məsələ üzrə cavabdehlik daşıyan qurumlar tərəfindən müəyyən tədbirlər həyata keçirilməlidir. İstisna deyil ki, sabah belə yerlər bizə lazım ola bilər. SSRİ vaxtında Bakı, Gəncə, Sumqayıt, Mingəçevir, Şirvan, Lənkəran kimi böyük şəhər və mərkəzlərdə sığınacaqlar var idi. Həmin ərazilər sonralar baxımsızlıq, səhlənkarlıq üzündən təyinatı üzrə istifadə olunmayıb.

Hamı Bakı şəhərində bioloji sığınacaq olaraq metronu nəzərdə tutur, lakin metro heç yarım gün də olsa insanların tələbatını ödəyə bilməz. Çünki ərzaq təminatı, su təminatı, havalandırma sistemi və lazım olan hər şey işlək vəziyyətdə olmalıdır. İnsanlar hər bir hadisəyə hazırlıqlı olaraq hansı istiqamətdə hərəkət edəcəklərini, nə edəcəklərini bilməlidirlər".

Ekspert vurğulayıb ki, hazırlıq məqsədi ilə təlimlər keçirilməsi mühümdür: "Dünyanın bir çox ölkələrində sırf reallığa yaxın təlimlər həyata keçirilir. Bu təlimlərdə insanlar müəyyən həyəcan siqnalında konkret olaraq necə davranmaları ilə bağlı təlimatlandırılırlr. Sığınacaq bir neçə mərhələ üçün nəzərdə tutulur: az müddətli və uzun müddətli. Sığınacaqlarda tələb olunan hər şeyin təmin olunması mütləqdir. Bizdə də təlimlər keçirilir, amma sığınacaqlarla bağlı hələ də ciddi işlər görülməyib. Ölkədə belə bir ciddi məsələni taleyin ümidinə buraxmışıq. Zaman-zaman mətbuat bu məsələləri gündəmə gətirsə də, reallıq budur ki, bu sahədə görüləsi xeyli iş var".

Qeyd edək ki, bioloji sığınacaqlar nüvə silahı, bioloji və kimyəvi hərbi maddələrin təsirlərindən və təbii fəlakətlərdən insanları qorumaq üçün nəzərdə tutulub. Əhali və nəqliyyat sıxlığının çox olduğu yerlərdə bombardmanlar zamanı çöldə olan insanların qorunmasını təmin etmək məqsədi daşıyır.