Metro nəzarətçiləri: qadınlar azalır, yoxsa…

Son vaxtlar Bakı metrosunun stansiyalarında nəzarətçi qadınların azaldığı, qatarların qarşılanıb yola salınması işinin kişilərə həvalə olunduğu müşahidə edilir. Avtosfer.az xəbər verir ki, bu barədə novator.az-ın bu barədə sualını cavablandıran “Bakı Metropoliteni” QSC-nin mətbuat xidməti və ictimaiyyətlə əlaqələr şöbəsinin rəisi Nəsimi Paşayev deyib ki, nəzarətçi seçimində yenilik tətbiq olunub: “Əvvəllər metropolitendə nəzarətçi vəzifəsinə daha çox qadınlar maraq göstərirdi. İndi isə təbliğat aparıb həmin sahəyə kişilərin də müraciət etməsinə şərait yaratmışıq. Təbliğat nəticəsində onları nəzarətçi işinə həvəsləndirə bilmişik.

İki dəfə elan verilib, təlim-tədris mərkəzində müraciət edənlərə kurs təşkil olunub. Həm qadınlar, həm də kişilər üçün yaş həddi, boy, təhsil tələbləri müəyyən edilib. Müraciət edənlərin arasından həmin tələblərə uyğun gələnləri seçirik, onlara bir aylıq kurs keçilir, imtahanı uğurla başa vuranlar işlə təmin edilir. Seçim məhz imtahanın göstəriciləri əsasında aparılır, kadrlara cinsinə görə heç bir fərq qoyulmur”.

Nəsimi Paşayev bildirib ki, metrodakı qadın nəzarətçilərin kişilərlə tam əvəzlənməsi siyasəti aparılmır: “Biz sadəcə kadrların cinsə görə bərabər sayda qəbul edilməsində maraqlıyıq”.

“İddialara görə, metro qadınların səhhətinə mənfi təsir göstərir, nəzarət işinə kişilərin cəlb olunması bununla bağlıdır” qeydini Nəsimi Paşayev belə cavablandırıb: “Bakı Metropolitenində qadınların səhhətinə heç bir təhlükə yoxdur. İndiyə qədər qadın işçilərin bu baxımdan problem yaşadığı haqqında heç bir fakt qeydə alınmayıb”.