Motosikletçi kamikadze polis bölməsinə hücum etdi

Motosikletçi kamikadze İndoneziyanın Yava adasının mərkəzində yerləşən Surakarta şəhərində polis bölməsinə hücum edib. Avtosfer.az “Reuters” agentliyinə istinadən xəbər verir ki, hücum zamanı kamikadze özünü partladıb.

Hadisə nəticəsində bir polis əməkdaşı yaralanıb.

Hücumdan sonra İndoneziyanın prezidenti Djoko Vidodo və şəhərin meri terrorçu ilə bağlı olan şəxslərin tapılaraq həbs edilməsi barədə polisə göstəriş verib. Terrorçunun şəxsiyyəti hələ müəyyən edilməyib. Xüsusi xidmət orqanlarının məlumatına görə, cinayətkar “İslam dövləti” (İŞİD) terror qruplaşmasının tərəfdarı olub.

Qeyd edək ki, bu ilin yanvarında paytaxt Cakartada silsilə partlayışlar törədilib. Nəticədə 10 nəfər həlak olub. Terror aktlarına görə məsuliyyəti İŞİD terror qruplaşması öz üzərinə götürüb.