“Nəqliyyat axınlarının planlaşdırılması və modelləşdirilməsi” III Beynəlxalq Konfrans keçiriləcək

2025-ci il yanvarın 30 və 31-də Almatıda Logistika və Nəqliyyat Akademiyasının bazasında (ALT University) “Nəqliyyat axınlarının planlaşdırılması və modelləşdirilməsi” III Beynəlxalq Konfrans keçiriləcək.

Avtosfer.az “Azərtac”a istinadla xəbər verir ki, III Beynəlxalq konfransda Azərbaycan, Belarus, Qazaxıstan, Qırğızıstan, Rusiya, Tacikistan, Türkmənistan və Özbəkistandan nümayəndələrin iştirakı gözlənilir. Nəqliyyat nazirliklərinin, şəhər nəqliyyat idarələrinin, nəqliyyat, elmi və elmi-tədqiqat təşkilatlarının nümayəndələri, beynəlxalq məsləhətçi təşkilatların mütəxəssisləri, nəqliyyat sahəsində ictimai və qeyri-kommersiya təşkilatlarının iştirakçıları, ali təhsil müəssisələrinin müəllim və tələbələri tədbirdə iştiraka dəvət olunub.

İlk günün işgüzar proqramında təşkilatların nümayəndələri şəhər nəqliyyat sistemlərinin istismarı və inkişafı sahəsində məruzələrlə çıxış edəcəklər. İkinci gün nəqliyyat makro və mikromodellərinin yaradılması üzrə proqramların istifadəçiləri üçün ustad dərsləri keçiriləcək, həmçinin Almatı dispetçer mərkəzinə texniki səfər olacaq.

Mütəxəssislərin sammiti Qazaxıstan Respublikası Nəqliyyat Nazirliyinin və Qazaxıstan, Almaniya və Özbəkistandan beynəlxalq şirkətlərin dəstəyi ilə keçiriləcək.