Nəqliyyat sektorunda ən aşağı maaşı kim alır?

Cari ilin yanvar-sentyabr aylarında nəqliyyat sektorunda çalışanların sayı 80 min 246 nəfər olub. Bu göstərici əvvəlki ilin müvafiq dövrü ilə müqayisədə 6.6% artım deməkdir. Avtosfer.az Oxu.az-a istinadən xəbər verir ki, hesabat dövründə nəqliyyat sahəsində çalışan işçilərin ortaaylıq əməkhaqqı 1 529.8 manat təşkil edib. Ötən ilin müvafiq dövrü ilə müqayisədə bu il nəqliyyat sektorunda ortaaylıq əməkhaqqı 12.4% artıb. Sektor üzrə ən yüksək əməkhaqqı hava nəqliyyatındadır. Bu sahədə çalışanların ortaaylıq maaşı 2 477 manat olub və ötən illə müqayisədə 24.4% artım müşahidə edilib. Digər yüksək maaş göstərilən sahələr sırasında qaz kəməri nəqliyyatı (2 405.2 manat), dəniz nəqliyyatı (2 354.9 manat) və boru kəməri nəqliyyatı (2 291.4 manat) yer alır. Ən aşağı əməkhaqqı isə poçt və kuryer xidməti sahəsində qeydə alınıb. Bu sahədə ortaaylıq maaş 655.4 manat təşkil edir. O cümlədən dəmir yolu nəqliyyatında maaş 1 435.6 manat, metroda 1 325.9 manat, avtomobil nəqliyyatında 1 018.7 manat, anbar təsərrüfatı və yardımçı nəqliyyat xidmətlərində isə 1 361.8 manat olub.