Paytaxt sakinlərinin NƏZƏRİNƏ: Tıxac vergisi tətbiq oluna bilər

“London, Stokholm kimi böyük şəhərlərdə tətbiq olunan “congestion charge” – yəni tıxac vergisi modeli gələcəkdə Bakıda da aktual ola bilər”.

Bu fikirləri nəqliyyat məsələləri üzrə ekspert Yasin Mustafayev səsləndirib.

Ekspert bildirib ki, iri şəhərlərdə tıxacın qarşısını almaq üçün müəyyən ərazilərə girişə vergi tətbiq edilir və bu, ora daxil olan avtomobillərin sayını azaltmağa xidmət edir:

“Belə sistem girişləri məhdudlaşdırmaqla tıxacın azalmasına səbəb olur. Dünyanın bir çox şəhərində tətbiq olunur. Bizdə bu barədə hələ düşünülmür, lakin tıxac daha da artsa, bu addıma ehtiyac yarana bilər”.

Onun sözlərinə görə, bu mexanizmin əsas məqsədlərindən biri də insanları ictimai nəqliyyata yönəltməkdir:

“İctimai nəqliyyat daha rahat hərəkət edir. Fərdi nəqliyyat vasitələrinin isə mərkəzi küçələrə girişinin məhdudlaşdırılması və vergi alınması tələb olunar. Hazırda Bakıda vəziyyət ürəkaçan deyil. Yaxın gələcəkdə mənzərə düzəlməzsə, xüsusilə şəhərin mərkəzi küçələrində girişlərdə bu tətbiq edilə bilər”.

Ekspert deyir ki, vəziyyət ağırlaşarsa, Bakıda da tıxac vergisinin tətbiqi real gündəmə çevrilə bilər./konkret.az