"Pegasus"un uçuşlarını bərpa etməsi sual altındadır

İstanbul-Qəbələ-İstanbul marşrutu ilə həyata keçirdiyi müntəzəm reysləri dayandıran Türkiyənin “Pegasus” aviaşirkətinin Azərbaycana uçuşlarını bərpa etməsi məsələsi sual altındadır.

Avtosfer.az xəbər verir ki, bu barədə "Pegasus”un mətbuat katibi Mehtap Çakıroğlu Kaynak “Report”a açıqlamasında bildirib ki, bu marşrut üzrə aviareyslərin bərpa tarixi hələ müəyyən edilməyib: “Çox təəssüf ki, şirkətimizin Azərbaycana həyata keçirdiyi İstanbul-Qəbələ və Qəbələ-İstanbul reyslərinin bir və ya iki ay sonra yenidən bərpa ediləcəyini dəqiq deyə bilməyəcəm. Çünki hazırda şirkət dayandırdığı aviareysin bərpası ilə bağlı heç bir qərar verməyib. Ümumiyyətlə, təyyarələrimizdə sərnişin yerlərinin boş qalmasını və rentabelliyin aşağı olmasını nəzərə alaraq, bəzi reysləri bağlamışıq. İstanbul-Qəbələ aviareysində təyyarələrdə sərnişin yerlərinin dolmadığı, mənfəət olmadığı üçün şirkət zərərlə işləyirdi. Bu səbəbdən marşrut üzrə də uçuşları dayandırdıq”.

Qeyd edək ki, azbüdcəli uçuşları ilə tanınan “Pegasus” bu il martın 18-dən Azərbaycana uçuşlar yerinə yetirməyə başlayıb. Qəbələ hava limanından həftədə 3 dəfə olmaqla I, IV və VII günlər Qəbələdən İstanbula, III, V və VII günlər isə İstanbuldan Qəbələyə uçuşlar yerinə yetirən şirkət oktyabrın 1-dən reysləri dayandırıb. Bu istiqamət üzrə bir tərəfə biletin qiyməti 90 manatdan, iki tərəfə - 155 manatdan başlayırdı. Eyni zamanda, aviaşirkətin xidmətindən istifadə edən sərnişinlərin Bakıdan Qəbələyə daşınması üçün Azərbaycandakı nümayəndəliyinin Bakı-Qəbələ və Qəbələ-Bakı avtobus marşrutu da fəaliyyət göstərib.