Pilot prezident haqqında moizəsinə görə reysdən kənarlaşdırıldı – VİDEO

Amerikanın Ostin şəhərində “United Airlines” şirkətinin qadın pilotu reysdən kənarlaşdırılıb, səbəb isə onun boşanması və ABŞ-da prezident seçkilərinin nəticələrinə dair moizəsi olub. Avtosfer.az Oxu.az-a istinadən xəbər verir ki, hadisə şənbə günü axşam saatlarında baş verib. Şahidlərin sözlərinə görə, Ostindən San-Fransiskoya 455-ci reysi üzrə uçan təyyarəni idarə etməli olan qadın salona adi geyimdə gələrək sərnişinlərə daxili rabitə vasitəsilə müraciət edib. Qadın bəyan edib ki, nə Klintona, nə də Trampa səs verməyib, çünki onlar “yalançıdır”. “Üzr istəyirəm, mən indi boşanma acısını çəkirəm”, - deyə əlavə edib. Reysin sərnişinlərindən olan Rendi Reys baş verənləri öz “Twitter” hesabında təsvir edib. “Mən əsirəm. Bu dəqiqə “United Airlines” 455 reysini tərk etdim, çünki təyyarənin kapitanı heç də yaxşı psixi vəziyyətdə deyil”, - o yazıb. Bir müddət sonra “United Airlines” pilotun başqa bir pilot ilə əvəz edildiyini bildirib. Reys təxminən bir saat yarım gecikib.