Piyadalar üçün YENİ QAYDA: Səkidə sürətli yeriyənlər cərimələnəcək

Slovakiyada piyadalar üçün sürət limiti qoyulduqdan 2 gün sonra ləğv edilib. 

Avtosfer.az xəbər verir ki, bu ölkədə yeni qanun layihəsinə görə, səkilərdə saatda maksimum 6 km sürətlə yeriyə bilərsiniz. Nəqliyyatın hərəkətinin tənzimlənməsi qanununa düzəliş parlamentdə qəbul olunub.

Yeni qaydalarla birlikdə sürət limiti velosiped və skuter sürücüləri ilə yanaşı, piyadalara da şamil edilib. Hakim “Smer” partiyasından bildirilib ki, qanunun dəyişməsində əsas məqsəd skuterlərlə toqquşmaların artması fonunda səkilərdə təhlükəsizliyi təmin etməkdir. Qanun 2026-cı il yanvarın 1-də qüvvəyə minəcək. 

Bu xəbər rəsmi mediada yer aldıqdan sonra sosial şəbəkədə məsxərəyə qoyulub. Parlament komissiyası müzakirələrdən 2 gün sonra açıqlama verərək mətndə düzəliş edildiyini bildirib.

Düzəlişə əsasən, sürət limiti yalnız səki ilə hərəkət edən velosiped və skuterlərə aiddir.

Vüqar Yaşaroğlu