Polis İdarəsindəki qarşıdurma ilə bağlı apellyasiya şikayəti

Sabunçu rayon Polis İdarəsində baş verən qarşıdurma zamanı saxlanılan şəxslərin apellyasiya şikayətinə baxılacaq.

Avtosfer.az “qafqazinfo”ya istinadən xəbər verir ki, bu barədə vəkil Elçin Sadıqov məlumat verib.

O bildirib ki, ilkin baxış iclası Bakı Apellyasiya Məhkəməsinin hakimi Vüqar Məmmədovun sədrliyi ilə sentyabrın 19-u keçiriləcək.

Qeyd edək ki, ötən ilin noyabrın əvvəllərində bir qrup dindar dövlət qeydiyyatı olmayan “Müsəlman Birliyi” Hərəkatı İdarə Heyətinin sədr müavini Elçin Qasımovun həbsi ilə bağlı Sabunçu Rayon Baş Polis İdarəsinin qarşısına toplaşaraq etiraz ediblər. Sahil Rzayev, Niftəli Vəliyev, Lətif Əhmədiv və Teymur Osmanov saxlanılıb və  onlar Cinayət Məcəlləsinin 233-cü (ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) və 315-ci maddələri ilə (hakimiyyət nümayəndəsinə qarşı müqavimət göstərmə və ya zor tətbiq etmə) ittiham olunublar.

Avqustun 3-də Sabunçu Rayon Məhkəməsində hökm oxunub. S.Rzayev 6 il 5 ay 15 gün, N.Vəliyev 5 il 11 ay 10 gün, L.Əhmədov 5 il 11 ay 20 gün, T.Osmanov 5 il 11 ay 15 gün azadlıqdan məhrum ediliblər.