Polis orqanlarına telefonla girmək QADAĞANDIR - Şöbə rəisi AÇIQLAMA VERDİ

Vətəndaşlar, xüsusən vəkillər polis idarə və şöblərinə daxil olarkən mobil telefonlarının alınmasından narazılıq edirlər. Həmçinin polis orqanlarının məxsus inzibati binalarında foto-video çəkilişlərin qadağan edilməsi müzakirələrə səbəb olub.

Mövzu ilə bağlı Avtosfer.az-a açıqlama verən DİN-in mətbuat xidmətinin şöbə rəisi Elşad Hacıyev bildirib ki, polis orqanlarının inzibati binasına smartfon telefonlar da daxil olmaqla, heç bir foto-video çəkiliş cihazlarının keçirilməsinə icazə verilmir: "Bu qadağa, polis orqanında çalışan əməkdaşlarla yanaşı, müraciət üçün gələn, dəvət edilən, gətirilən, yaxud digər şəxslərin təhlükəsizliyindən irəli gəlir. Nəzərə alınmalıdır ki, fasiləsiz xidmət göstərən polis cinayət və ya digər hüquqpozmalar törədən şəxsin tutulması və polisə gətirilməsi üçün tədbirlər görür".