Polis rəisinin dələduzluqda təqsirləndirilən həyat yoldaşının məhkəməsi davam edir

Bakı Ağır Cinayətlər Məhkəməsində dələduzluqda təqsirləndirilən Leyla Əkbərovanın məhkəməsi davam etdirilib. Avtosfer.az apa-ya istinadən xəbər verir ki, iclasda zərərçəkmiş Ceyhun Tağıyev ifadə verib. O, həyat yoldaşını işə düzəltmək üçün L.Əkbərovaya 9 min manat pul verdiyini deyib. Zərərçəkmiş Leyla Cəfərova və Aynur Cəfərova özlərinə pensiya təyin etdirmək məqsədilə ona pul verdiklərini deyiblər. Zaur Elmanov isə bildirib ki, internat evinə işə düzəlmək üçün Leyla Əkbərova ilə 15 min manat verib.

L.Əkbərova zərərçəkənlərin hamısının yalan danışdığını iddia edib. O, Z. Elmanovdan 11 min manat aldığını və sonra qaytardığını deyib.

Qeyd edək ki, Binəqədi Rayon Polis İdarəsinin narkotiklərlə mübarizə şöbəsinin keçmiş rəisi Mahir Əkbərovun həyat yoldaşı L.Əkbərova özünü internat evinin müdiri kimi təqdim edərək dələduzluq etməkdə təqsirləndirilir. Cinayət Məcəlləsinin 178.3.2-ci (külli miqdarda dələduzluq) və 320-ci (saxta sənəd hazırlama) maddələri ilə ittiham olunur.

Məlumata görə, 95 saylı orta məktəbdə müəllimə işləyən Leyla Əkbərova əri Mahir Əkbərovun qardaşı Elçin Əkbərov vasitəsilə xaricə qaçmaq istəyirmiş. O, pasportunu dəyişdirərkən saxlanılıb. Elçin Əkbərov Ədliyyə Nazirliyi Penitensiar Xidmətinin 9 və 14 saylı məntəqə tipli cəzaçəkmə müəssisələrində rəis işləyib və hazırda Almaniyada mühacir həyatı yaşayır.

Adı dələduzluqda hallanan polis rəisi Mahir Əkbərov polis orqanlarından xaric edilib.